ચોમાસામાં ડાંગ પ્રકૃતિ સોળે કળાએ ખીલી, અંજન ગુફા અને ધોધ જોવા પ્રવાસીઓની ભારે ભીડ

ચોમાસાના આગમન સાથે જ ડાંગના ઐતિહાસિક અને ધાર્મિક મહત્વ ધરાવતા અંજન કુંડ અને અંજન ગુફા ખાતે પર્યટકોનો ભારે ઘોડાપૂર જોવા મળી રહ્યો છે. ખાસ કરીને અહીં વહેતા અદભુત ધોધના કારણે અંજન ગુફા હાલ પ્રવાસીઓ માટે સૌથી મોટું આકર્ષણનું કેન્દ્ર બની ગઈ છે. કુદરતના ખોળે વસેલી આ જગ્યાના નજારા લોકોને માનસિક શાંતિનો અનુભવ કરાવી રહ્યા છે.

અંજન ગુફા અને ધોધ સુધી પહોંચવા માટે પ્રવાસીઓએ આશરે 1 થી 2 કિલોમીટર સુધીનું સુંદર ટ્રેકિંગ કરવું પડે છે. આ ટ્રેકિંગ રૂટ પર પ્રકૃતિને એકદમ નજીકથી જોવાનો લહાવો મળે છે. અહીં આવતા પર્યટકો માટે સૌથી ખાસ અનુભવ ધોધની બરાબર પાછળ ઊભા રહીને પડતા પાણીની વચ્ચેથી કુદરતી નજારો જોવાનો છે. પ્રવાસીઓ આ યાદગાર પળોને પોતાના કેમેરા અને સેલ્ફીમાં કેદ કરતા નજરે પડી રહ્યા છે.

ડાંગ જિલ્લામાં સાપુતારા સિવાય પણ અનેક એવા છુપા પ્રકૃતિના ખજાના છે જે ચોમાસામાં જીવંત થઈ ઉઠે છે. ડાંગના વિવિધ ધોધોમાં હાલ અંજન ધોધ પ્રવાસીઓની પહેલી પસંદ બની ગયો છે. જો તમે પણ ચોમાસાની ઋતુમાં શહેરી કોલાહલથી દૂર જઈ ટ્રેકિંગ અને વોટરફોલનો અનોખો આનંદ માણવા માંગતા હોવ, તો ગુજરાતનું આ મિની કાશ્મીર એટલે કે ડાંગ તમારા માટે શ્રેષ્ઠ સ્થળ છે.